10-11-րդ դասարանների անգլերենի ընտրությամբ դասընթացի ծրագրով որոշված ուսումնական նախագծի մշակման-իրականացման մեթոդական նկարագրության ստեղծում
Նախագիծ
«Հայ մշակույթը անգլերեն» ընդհանուր նախագծի շրջանակներում Միքայել Չամչյանի «The History of Armenia» գրքի հիման վրա «Հայոց պատմությունը» անգլերեն համառոտ դասընթացի ստեղծումը և կիրառումը Ավագ դպրոց-վարժարանում
Նախագծի կատարման ժամկետները. 2013-2014 ուսումնական տարի
Նախագիծն իրականացնողները. 10-11-րդ դասարանների սովորողներ` Յուրա Գանջալյանի ղեկավարությամբ
Նախագծի ուսումնական նպատակը. Ստեղծելով Միքայել Չամչյանի «The History of Armenia» գրքի հիման վրա «Հայոց պատմությունը» անգլերեն համառոտ դասընթացը և միաժամանակ կիրառելով այն Ավագ դպրոց-վարժարանում սովորողները`
- ձեռք են բերում հայ ժողովրդի պատմությունը անգլերեն ներկայացնելու կարողություններ
- ձեռք են բերում պատմա-քաղաքական, տնտեսական և մշակութային կյանքին վերաբերող ակտիվ թեմատիկ բառապաշար և նման թեմաները քննարկելու կարողություն անգլերենով
Նախագծի գործնական նպատակը. Ստեղծվում են հայ ժողովրդի պատմության անգլերեն լեզվով համառոտ էլեկտրոնային դասընթացներ
Նախագծի իրականացման համար անհրաժեշտ կազմակերպչական աշխատանքներ
- Սովորողներին է ներկայացվում անգլերեն բարդ տեքստերը համառոտ և ավելի պարզ լեզվով փոխակերպելու համակարգչային ծրագիրը` http://freesummarizer.com/
Նախագծի իրականացման ընթացիկ աշխատանքների մեթոդական կազմակերպում
Այս ծրագրով յուրաքանչյուր սովորող կարող է իր ընդունակությունների սահմաններում համառոտ ձևով ամփոփել ցանկացած տեքստ: Ծրագիրը հնարավորություն է տալիս սովորողին 4-5 էջանոց տեքստի հիմնական բովանդակությունը ունենալ մեկ էջի կամ նույնիսկ 10 տողի սահմաններում: Աշխատելով անձնական նոթբուք-նեթբուքերով, սովորողներից յուրաքանչյուրը կունենա իր համառոտագրած դասընթացը, որը կարող է էապես տարբերվել իր դասընկերների կողմից ստեղծված դասընթացից: Այսպիսով ուսուցման գործընթացը խիստ անհատականացվում է: 10-րդ դասարանի մի սովորող կարող է ունենալ ավելի ընդարձակ և ավելի բարդ լեզվով գրված դասընթաց, քան 11-րդ դասարանի մեկ այլ սովորող: Այսպիսով անհատական դասընթացները կազմվում են ըստ անհատական լեզվական ունակությունների, հետաքրքրվածության աստիճանի և հետաքրքրությունների դաշտերի: Անհատական լեզվական ունակությունների և հետաքրքրվածության աստիճանի մասին արդեն խոսվել է, իսկ ահա հետաքրքրության դաշտերի մասին կարելի է ասել հետևյալը. մի սովորողի կարող է ավելի շատ հետաքրքրել տվյալ դարաշրջանի միայն ժամանակագրական տեղեկությունները, մյուսին`տնտեսական կյանքն ու հարաբերությունները, իսկ երրորդին` մշակույթը:
Միքայել Չամչյանի գիրքը հրատարակվել է 19-րդ դարում և այն ժամանակվա հրատարակչական հնարավորությունները սահմանափակ էին նկարների, պատկերների, քարտեզների առումով: Սովորողները կարող են լրացնել այս բացը` օգտվելով համացանցից ու անպայմանորեն նշելով աղբյուրները:
Սովորողներն իրենց ստեղծած նյութերը տեղադրում են իրենց ուսումնական բլոգներում: Յուրաքանչյուր նոր տեքստի տակ գրվում են նոր բառերն ու բառակապակցությունները, որոնք արժանի են մտապահելու: Ուսումնական տարվա վերջում սովորողն իր բլոգում ունենում է իր ստեղծած անհատական դասընթացը:
Յուրա Գանջալյան
ganjalyanyura 